كيف يمكن فعليا أختراق الأقمار الصناعية وأكاذيب أعلاميه !! ( الجزء الثانى )

السلام عليكم ورحمه الله وبركاته

أستكمالا لموضوعنا الجزء الأول  علشان نعرف الناس دى بتخترق بجد ولا بتتكلم اى كلام لازم نتكلم بشكل علمى ولازم نعرف يعنى أى بث تليفزيونى عن طريق القمر الصناعى الأقمار الصناعيه موضوع كبير جدا لكن النهارده كلمنا عن أقمار البث التلفزيونى ومبدأيا أغلب أقمار البث التليفزيونى بتستخدم البث الرقمى والقمر الصناعى من غير مندخل فى تعقديدات اعتبره جهاز الكترونى موجود فى مدار حولين الأرض مرتبط بالجاذبيه الأرضيه على ارتفاع معين بيدور برضو بسرعه معينه والسرعه دى بتختلف حسب مكان القمر ومداره لكن على مدار البث بدور حولين الأرض كل 24 ساعه على أرتفاع مش أقل من 36 الف كيلو متر ودا معناه ان القمر ليه نقط محدده بيتعامل معاها على الأرض  وهى الأرسال والأستقبال وهنشرح دا بالتفصيل فى موضوع أخر نرجع تانى لاقمار البث التليفزيونى واللى هى عباره عن مقويات لاشاره البث بشكل بسيط يعنى أشاره البث بتطلع من محطه البث اللى موجوده مثلا فى مدينه الأنتاج الأعلامى او فى اى مكان تانى الاشاره الصاعده أسمها Uplink والأشاره المرسله للأرض أسمها Downlink وبالمناسبه الترددات دى وانوعها متعارف عليها دوليا بعد كدا القمر دا بياخد الاشاره دى ويقويها ويرجع يبعتها تانى للأرض بمساحه معينه وترددات معينه  الترددات اللى بيبعتها القمر للارض او للمشاهدين اسمها Downlink دى ببساطه شديده طريقه عمل البث التلفزيونى من غير اى تعقيد لكن فى اقمار صناعيه بتبث الأشاره بتاعت ال Downlink لمزود خدمه هو اللى بيوزع الأشاره بعد كدا للمشتركين عن طريق فك تشفير الاشاره زى القنوات المشفره او عن طريق اشتراكات والاجهزه دى انواع البث التلفزيونى عن طريق القمر الصناعى نيجى بقى لموضوع الأختراق تفتكر القصه المعقده اللى بسطهالك دى لو حد عايز يخترقها يخترقها ازاى يترى يخترق القمر الصناعى ولا هيخترق القناه ولا هيخترق التردد ولا هيخترق اجهزه البث ولا اجهزه الأستقبال ولا وحده الحكم فى القمر الصناعى ولا مزود الخدمه فى حاله القنوات المشفره طبعا الأختراق الاسهل فى كل اللى قولناه دا أن حد يكون شغال فى القناه او موجود داخل المنظومه فى محطه البث هو الشخص دا اللى هيخترق القناه عن طريق توصيل جهاز البث بالأنترنت والتحكم فيه عن بعد عن طريق اى برنامج من ريمود كنتروال ودى كتير جدا واتحدا اى حد يخترق قناه فضائيه ميكونش ليه علاقه باى حد داخل القناه ممكن تسئل وتقول اى اللى يمنع اى حد يخترق جهاز البث من بره القناه اللى يمنع أن الأجهزه 

معروفه باسم  Playout service مش متصله بأغلب الأحيان بالأنترنت ولو متصله بالأنترنت فى الحاله دى هتبقى حضرتك محتاج تجيب  معلومات الجهاز من جوه القناه والا هتعرف معلومات جهاز البث منين لو أنت مش شغال فى القناه أو على علاقه بحد هناك 

لكن دى طبعا مش الطريقه الوحيده لأختراق فى طرق تانيه كتير ومن أشهرها التشويش التشويش أحد أساليب التأثير على أشاره البث دا محتاج معرفه الترددات واجهزه قويه جدا للتشويش على الأشاره للى طالعه للقمر الصناعى وفى الحاله دى التشويش هيكون عند كل الناس اللى بتستقبل القناه فى وقت واحد مش بس كدا دا هيأثر كمان على كل القنوات اللى على نفس التردد يعنى هيأثر على أكثر من قناه فى نفس الوقت وعلشان تفهم موضوع التشويش كويس افتكر التشويش اللى كان بيحصل على قناه الجزيره ايام كاس العالم وايام الربيع العربي فى تشويش تانى بيحصل على ترددات ال Downlink 

اللى بيبعتها القمر الصناعى لأرض ودى برضو محتاجه أجهزه متخصصه فى التشويش لكن قدراتها اقل من قدرات التشويش على الUplink التشويش مشكلته أن اللى بيعمله على اى قمر صناعى ممكن يتعرف مكانه وفى تقنيات كتير جدا للموضوع دا 

وفى أنظمه معقده للتحكم فى التشويش وتحديد مصدره الأجهزه دى كمان بتتباع للأنظمه الملاحيه زى الطيران والبحريه 

اللى بتستخدم الأقمار الصناعيه فى الأتصالات النقطه التانيه ان التشويش أساسا مجرم دوليا وفى أتفاقيات كمان للحد من التشويش على الأتصالات الأسلكيه لكن دا ميمنعش أنه بيحصل !! فى 2005 مثلا ليبيا شوشت على أقمار صناعيه بتبث فى أوروبا وقطعت أتصالات بعثات دبلوماسيه وفى 2006 شوشت ليبيا على أقمار هواتف الثريافى 2006 برضو شوشت أسرائيل على قناه المنار 

وهى من القنوات اللبنانيه وقت الحرب الصين أيضا من الدول المتخصصه فى التشويش على الأقمار الصناعيه وعندها اجهزه تشويش على أقمار كتير جدا مش بس كدا دول بيبيعو أجهزه تشويش على ال GPS على الأنترنت واى حد ممكن يشتريها للأسف ويعمل مشاكل كتير على ال GPS مره تانيه موضوع التشويش مش سهل وبيبقى فضايح واللى بيشوش بيتعرف مكانه طيب يعنى موضوع التشويش استبعدناه من قصه الأختراق ومستحيل يكون الشباب اللى انت سمعتهم مع احمد موسى دول بيعملوه فى طرف تانيه لاختراق الاقمار الصناعيه لكن ملهاش علاقه بالقنوات الفضائيه فى انظمه للتواصل مع الأقمار الصناعيه أسمها VSAT

ودى أستخداماتها كتير جدا من أول الأنترنت الفضائى لحد الأنظمه البنكيه والملاحه ودى أختراقها مش سهل لكن فى مجموعه من الهكرز قدرو فعلا يخترقو نظام من الأنظمه دى فى مؤأتمر من مؤتمرات الهكرز بسبب ثغره فى النظام وليهم فيديو على الأنترنت بعنوان Hacking a Bird in the Sky مشكله نظام VSAT أن فيه أتصال مباشر بالقمر الصناعى يعنى Uplink و Downlink دا غير انه معتمد على برامج وأنظمه كمبيوتر ممكن الوصول ليها بأساليب الأختراق المعروفه عند المتخصصين بالكمبيوتر لكن زى مقولتلك الموضوع دا ملوش علاقه بأختراق القنوات الفضائيه فى طرق تانيه لاختراق أسمها هاى جاكى يعنى hi Jackie يعنى الأختطاف !! بمعنى بسيط يعنى الهكرز يقدر يسرق أشاره أتصال بالقمر الصناعى ويحط الأشاره الخاصه به والأشاره بتعته هى اللى توصل للناس بدل الأشاره الأصليه سنه 1977 قناه ITN اللى بتبث فى بريطانيا أتعرضت لتشويش واتحطط رساله مكان البث الأساسى وناس كتير سعتها قالت دا فضائيين طبعا الكلام دا مكنش صح فاضل طريقه كمان لاختراق الأقمار الصناعيه والتحكم فى القمر نفسه عن طريق اختراق وحده الحكم ودى أكثر نقطه متأمنه وفى أغلب الأقمار الصناعيه المهمه بتبقى تابعه لتحكم وحدات عسكريه ومش سهل ابدا على اى حد عادى قاعد فى بيتهم انه يخترق قمر صناعى والى هنا ننتهى من موضوع اليوم والى لقاء فى مواضيع أخرى .